Белли ки, 2007 сенеси январь 18-де «Олви-Крым» фирмасы Акъмесджиттеки Балаклавская сокъагъында ерлешкен къырымтатар наразылыкъ мейданына гедже вакътында уджюм эткен эди. О вакъыт Даниял Аметов милиция хадимине гуя къаршылыкъ косьтергени ве онъа джисманий зарар еткизгени махкеме такъикъаты къозгъалмасы ичюн формаль бир маначыкъ олды. Аметовнынъ насылдыр укъукъ бозуджы арекетлерини исбатлагъан ич бир делиль ёкътыр. Юкъарыда анъылгъан вакъиа юзь бергенде исе Аметов Балаклавская сокъагъында эки эсас себептен булуна эди. Биринджиден, Къырым Юкъары Шурасы реисининъ топракъ меселеси боюнджа меслеатчысы оларакъ, экинджиден — къырымтатарларнынъ анаяса укъукъларыны къорчалагъан «Авдет» джемаат тешкилятынынъ башы оларакъ.
Къырымтатарларнынъ эксериети Даниял Аметов бу йыл октябрь 31-де оладжакъ сайлавларда Къырым Юкъары Шурасына депутатлыкъкъа намзет олгъаны ве оны халкъ нам-зети оларакъ сайлавалды курешинден четлештирмёге ынтылгъанлары себвбинден махкеме этильди, деп сая.
Даниял Аметов махкюм этильген сонъ къырымтатар наразылыкъ мейданларынынъ иштиракчилери Украина Президентининъ Къырымдаки эльчиханеси огюнде митинг кечирмеге къарар алгъан эдилер. Лякин шимди кетеяткъан сайлавалды кампаниясы девамында чешит тюрлю провокацияларгъа ёл бермемек ичюн, ватандашларымыз митинг ерине Украина Президентининъ адына ресмий мураджаат ёлламакъ къарарына кельдилер. «Бир де-бир сиясий кучь Даниял Аметовнинъ махкемесини PR-компания сыфатында къулланмасыны истемеймиз. Аметовнынъ иши Аппеляцион махкемеде гъайрыдан бакъылмасына наиль олмагъа тырышаджакъмыз», — деп бильдирелер наразылыкъ мейданларынынъ иштиракчилери.
Ринат ШАЙМАРДАНОВ,
«Авдет» джемаат тешкилятынынъ матбуат кятиби