Тедбирде Тюркиеден кельген мусафирлер, КъМПУ, ТМУ оджалары, китапханеджилер, маарифчилер, рессамлар, санатшынас, джемаат эрбаплары ве журналистлер булунып, клуб адына хайырлав сёзлеринен Тюркиедеки къырымтатар дернеклерининъ Анкъарадаки баш меркези реисининъ муавини Намыкъ Кемаль-Баяр, Бурса къырымтатар дернегининъ башы Аднан Сюен, «Маарифчи» бирлешмесинден Бейе Ильясова ве Шефикъа Абдураманова, рессам Зарема Трасинова ве дигерлери чыкъышта булундылар.
Исмаил Гаспринский мемориал музейининъ ильмий хадими Эльмира Абибуллаева «Шефикъа Гаспринская: тарихий экскурс» марузасыны, Багъчасарай девлет тарихий-ильмий заповеднигининъ ильмий хадими Ленара Чубукъчиева «XX асырнынъ башында къадынлар арекети» марузасыны, ТМУ къырымтатар эдебияты кафедрасынынъ оджасы Гульнар Сеитваниева «Шефикъа Гаспринская — «Алем-и Нисван» меджмуасынынъ муаррири» марузасыны такъдим эттилер. Гаспринскийлер сюлялесининъ векили — сексен дёрт яшлы Нияр апте Яшлавская Шефикъа ханымнынъ 1960-нджы сенелерде Тюркиеден ёллагъан ресим ве мектюплерини косьтерди ве намлы акърабалары акъкъында икяе этти.
И. Гаспринский адына джумхуриет къырымтатар китапханеси мудирининъ вазифесини эда этиджи Гульнар Ягъяева ве окъув залынынъ мудири Лейля Къадырова тедбирде «Шефикъа Гаспралы — маарифпервер къадын» деген китап ве девирий неширлерден ибарет сергини ачтылар.
Шефикъа Гаспринскаянынъ фаалиети акъкъында маруза ве чыкъышларгъа екюн чекилиркен, «Ненкеджан» къадынлар клубы тарафындан келеджек сене октябрь 14 куню «Тюрк дюньясы къадынлар арекети: тарих ве истикъбаллер» мевзусында халкъара конференциясыны кечирюв тешеббюси акъкъында илян этильди.
Къадынлар клубында «Келинлер мектеби»ни ачмакъ гъаесинен кель
ген «Яшлар седасы» генчлер тешкилятынынъ башы Алие Кефилева ве азалары топлангъанларны озь лейхаларынен таныш эттилер. Клубнынъ невбеттеки топлашувында «Келинлер мектеби» озь программасыны такъ­дим этеджек.
«Козьайдын» ресурс-информацион меркезининъ башы Зарема Хайрединова озюнинъ янъы Караоке дискини нумайыш этип, «Айнени» CD дискининъ   1   дане нусханен  чыкъарылмасына маддии джеэттен къолтуткъан Анкъара баш меркезине тешеккюрлерини бильдирди ве тедбирнинъ мусафирлерине янъы дисклерни багъышлады.
Тедбирни халкъымызнынъ белли санатчылары Гулизар Бекирова, Афизе Касара, Зоре Къадыева, Афизе Юсуф къызы, Кезлевден ве Багъча-сарайдан кельген оюнджы къызлар яраштырдылар.