Кечкен афтанынъ сонъунда Къырымда резонанслы вакъиа садир олды — укъукъкъорув органларынынъ векиллери «КрымНИИпроект» институты козетюв кенъешининъ реиси Александр Грессни якъаладылар. О, къанунсыз суретте алтмыш миллион гривня (7,5 млн дол­лар) эльде эткенинде къабаатлана.

Акъяр шеэр прокуратурасында чалышып, озь адыны айтмагъа истемеген хадимлернинъ бириси: «Гресс баягъы эвельдже якъаланмакъ керек эди, лякин къачып юре эди», — деди.
Газеталарнынъ язгъанына коре, Сергей Куницынге якъын олгъан бу адам 2006 сенесининъ кузюнде рейдер уджюми тешкипь этип, «КрымНИИпроект» институтыны озь къолу астына алгъан. Бундан гъайры, А. Гресснинъ незарети алтында Акъяр Топракъ ресурслары идареси, топракъ кадастры ве топракъ инспекциясынен багълы бир сыра муэссиселер булуна экен.

Даа эвельси, 2003—2005 сенелери исе А. Гресс Къырымнынъ малие назири олып чалышкъан, озь вакътында Акъмесджит шеэр головасы вазифесине кенди намзетини косьтерген эди.