ЭН БАЛАБАН ЧИБЕРЕК!

Ашчылары Гиннес рекордлар китабына ляйыкъ чиберек пиширдипер.

Къырымтатарларнынъ севген ашы чиберек!

Кеченлерде Кезлевде раатлыкъ мевсими ресмий суретте башлангъаны мунасебетинен чиберек байрамы отькерильди. Шеэрдеки «Джеваль» ресторанынынъ ашчылары Гиннес рекордлар китабына ляйыкъ чиберек пиширдипер. Онынъ узунлыгъы 55 см, кенълиги 30 см, агъырлыгъы исе 1,5 кг. Бойле чиберекни пиширмек ичюн 1 кг ун ве 30 литр ягъ ишлетильди.

Хамырны тешмейип чиберекни экинджи янына айландырмакъ ашчынынъ усталыгъына багълы. Кезлевпи чиберек усталары 55 сантиметрлик чиберекни сейирджилернинъ огюнде ойле бир усталыкънен экинджи тарафына айландырып, бир къач дакъкъадан балабан табакъкъа къойды, ве Одун базар къапысы огюндеки мейдангъа чыкъардылар.Мейданда топлангъан бинъден зияде сейирджи чиберекни сатын алмагъа истеди. Бу ерде отькерильген аукционда 1,5 киллограмлыкъ чиберек акъмесджитли Виктор адлы адамгъа 350 гривнагъа сатылды. «Акъшам къорантамнен топлашып, чиберекни ашайджакъмыз», — деди Гиннес китабына кирген чиберекнинъ саиби.

Аукциондан сонъ мейданда чиберек севдалары арасында ярыш отькерильди. Днепропетровск шеэринден кельген 22 яшлы Александр Залесский 10 чиберекни эр кестен тез ашады.