Сентябрь 29-октябрь 5 куньлери Кефеде «Спивограй» адлы ачыкъ халкъара санат конкурс-фестивали олып кечти. Бу йыл фестиваль эки юбилейини къайд этти. Биринджиден, фестиваль 15 яшыны толдурды, экинджиден исе о Кефеде мына энди 5 йылдан берли отькериле. Мында солистлер, вокаль такъымлар, хореографлар, театр коллективлери ве мода театрлери иштирак этелер. Бу йыл фестивальге Украина, Къырым, Беларусие, Молдова, Русие, Полония, Булгьаристандан ве дигер мемлекетлерден 60 иштиракчи кельди. фестиваль иштиракчилери, адети узьре, 1-3-нджи дереджели дипломларнен такъдирлендилер.
Шусы къуванчлы ки, бу йыл фестивальде Къырымны такъдим эткен яш къырымтатар йырджысы Диляра Махмудова озь чыкъышынен эр кесни айретте къалдырып, нетиджеде, Гран-при къазанды. Яш бульбулимизни сейирджилер аякъ устюнде, гурьдели эльчырпмалар иле алгъышладылар. Къайд этмели ки, Диляра 2008 сенеси бу фестивальде иштирак этил, о вакъыт биринджи ерни къазангъан эди. Онынъ айткъанына коре, фестивальде пек джиддии конкурсантлар иштирак этти ве о бу йыл Гран-приге наиль оладжагъына умют этмеген эди. Иште, къырымтатар йырджысы Къырымгъа кельген мусафирлерни айретте къалдырып, музыкамызны тешвикъ этювге даа бир иссе къошкъаны эпимизни къувандыра.
Биз Диляраны невбеттеки гъалебесинен джан-юректен хайырлап, онъа даа буюк мувафакъиетлерге иришмесини тилеимиз!
Источник: Янъы дюнья
Автор: Эльмара МУСТАФАЕВА
News maker www.selyam.com
2010-10-08 18:59:01
Раздел: Музыка
|
|
Разделы
|
Все комментарии [ 0 ]