Сервер Аметов (сагъдан биринджи) къорантасынен

Тек     Русие Федерациясында дегиль, башкъа ерлерде де адамларны тек-миль  шашырткъан бу къатилликнинъ устюни ачмакъ   ичюн Москвадан   Кубаньгъа такъикъат  органларынынъ энъ буюк вазифедарлары, энъ яхшы такъикъатчылар келип  чыкътылар.  Краснодар улькесиндеки укъукъ къорув органларынынъ бутюн хадимлери аякъ устюне турдылар, ульке губернаторы джинаетчилер акъкъында керчек  малюмат  бере  бильген адамларгъа бир миллион руб­ле микъдарында мукяфат тайинледи...
Бу йыл ноябрь 5-ке кечер геджеси Краснодар улькесин­деки Кущевская станицасында яшагъан фермер Сервер Аметовнынъ къомшулары Сервернинъ эви янып башлагъаныны абайлап, бу акъта къызы Лилягъа хабер эткенлер. Лиля Аметова эв ичине кирер экен, дешетли манзараны коре: мында 12 адамнынъ, шу джумледен докъуз айлыкъ баланынъ джеседи ята эди. О куню Серверге мусафирликке онынъ Ростовдаки танышлары кельген, шу арада хошкельди айтмагъа къомшусы да кирген экен. Къатиллер бу эвде эки баладан гъайры, эр кесни пычакълагъан, эки балачыкъны исе богъуп ольдюргенлер.
Такъикъатчылар илькиде «бесе-белли джинаетчилерни Аметовларнынъ мусафири —аллы-такъатлы иш адамы Мироненко меракъландыргъандыр, лякин башкесерлер тек онынънен сынъырланмайып, Аметовдан да ахтыман алмагъа истегендирлер» деген версияны огге сюрдилер. Чюнки бундан бираз эвельдже С. Аме­тов рэкетчилерге акъча тёлемектен баш чеккен экен. Ме­гер, о ерлерде бутюн орталыкъны къоркъу ичинде туткъан мааллий айдутлар гурухы арекет эте экен. Шимди олар якъалангъан сонъ ерли сакинлер шу гурухнынъ азалары акъ­къында баягъы малюматлар берип башладылар. Бундан гъайры, айдутларны озь къорувы астына алгъан мааллий милиционерлерге нисбетен де къатты чарелер корюледжек. Оларгъа «не ичюн Кущевская станицасында эр бир адамгъа белли олгъан айдутлар бандасы озь вакътында ёкъ этильмеген эди?» деген суаль бериледжек.
Шимдилик башкесерлер гурухынынъ энъ фааль дёрт азасы омюрлик апс джезасыны беклей.