«Даа якъында шеэрнинъ мэри оларакъ сайлангьан Виктор Агеев къанун огюнде эр кес бир олгъаныны ве махкеме чыкъаргьан къарарны бир минсиз ерине кетирмек зарурлыгъыны анъламакъ керек, - деди Рефат Чубаров. — Бойле фикирни сёйлеген Агеев къанунгьа нисбетен урьметсизлик косьтере, албу ки о, Украина къанунларыны там эда этмек борджлудыр».
Матбуат васталарында энди хабер этильгени киби, Виктор Агеев журналистлер огюнде чыкъышта булунып, джами къуруджылыгъы меселеси аля даа ачыкъ олгъаныны айтты. «Мен кильселер ве джамилер къурулмасына къаршы дегилим, амма бунынъ ичюн бегенильген ерни дегиль де, эр кеске онъайтлы ве келишкен бир ерни бельгилемек керек. Шунынъ ичюн шеэр акимиетининъ Ходжалыкъ махкемесининъ джами илле Ялтинская 22-де къурулмасы боюнджа къарарына бойсунмасы шарт дегиль», — деди.
Къырым мусульманлары идаресининъ менфаатларыны махкемеде къорчалагъан адлиеджи Хатидже Мамутова диний идаре къанунгъа там бойсунаракъ иш туткъаныны бильдире. Лякин джами ичюн талап этильген ерде бес-белли башкъа бир кучьлернинъ де козю бар, чюнки о ерни шеэрнинъ къапылары демек де мумкюн,   дей Хатидже ханым.
Шуны да хатырлатмалы ки, Украина Президенти Виктор Янукович къырымтатар джемаат тешкилятларынен шу сене август 3-те олгъан корюшювинде Акъмесджитте Буюк джами мытлакъа къуруладжакъ, деп сёз берген эди.