Балыкълава районынынъ Буюк Мускомья коюнде дюньягъа кельген эки генч сюргюнликте, Озьбекистаннынъ Янгиюль шеэринде таныш олып, бири-бирине севда олалар. 1944 сенеси майыс 18-де халкъымызнынъ башына кельген фаджиа Эмине апте ве Сабри агъанынъ хатырасында къара кунь олып, аля бу кунь акъылларында тура. Эмине аптенинъ анасы ве бабасы сюргюнликнинъ биринджи йылында вефат этелерве дёрт бала оксюз къала. Къардашларыны бакъып осьтюрген дюльбер, незакетли, эмексевер, узун сачлы Эмине Сабри деген йигитнинъ юрегини эсир эте. Саб­ри агъа санки бири-бирини тюневин корип севда олгъан киби, шу кунни гонъюль хошлугъынен хатырлай:
—   Бизим къоранталарымыз бир баракта яшай эди. Эминени чокъ ерден сорап кельселер де, о мени сайлады.
—  Къартбаба, сизинъ фикиринъиздже, дюньяда севги бар­мы? — деген суалимизге:
—   Юрегимизде севги олмагъан олса, бу къадар йыл берабер яшап, дёрт бахытлы эвлят осьтюрмез эдик, балам, — деп джевапланды Сабри агъа. - Чанакъ-чёльмек шатырдамагъан къоранта олмай, амма эр алда бири-биринъни анъламагъа, керек ерде сабыр этмеге тырышмакъ керек, даима ян-янаша, бири-бирине таянч олып яшамалы.
Аилевий аятнынъ биринджи кунюнден совхозда багъча-джылыкънен огърашып, озь эмегинен эр бир ниетине иришмеге алышкъан яшлар, тезден топракъ алып, эв къуралар, о вакъыт пек мот олгъан «Побе­да» машинасыны сатын алалар.
—   Бир де-бир муим шей япаджакъ олсакъ, башта бир экимиз бир фикирге келип, сонъ барып ана-бабамызнен акъыл таныша эдик, — дей Саб­ри агъа.
—   Рахметли къайнанам пек мерхаметли, къансыджакъ къадын эди. Мен оны озь анам ерине коре эдим, — деп хатыр­лай Эмине апте. - Энди озюм де къайнана олдым, амма учь келинимни де къызларым, деп севем. Бугуньки кунюмизге чокъ шукюр. Башымыздан чокъ шей келип-кечти, амма Алланынъ ярдымынен аля бу кунь берабер олып, балаларымызнынъ, торунларымызнынъ къуванчыны корип, Ватанда яшамакъ къысмет олды.
1989 сенеси Орджоникидзе районынынъ Дюрмен совхозындан Акъмесджит районынынъ Къояш (Водное) коюне кельген ильк къырымтатар къорантасы — Сабри агъа Ибраимовнынъ аилеси эди, ондан сонъ койге келип ерлешкен эр бир къоран­та башта Сабри агъанынъ эвинде токътай эди. Эмине апте ве Сабри агъа огълу Мусевверни эвлендирип, къартана-къартбаба къуванчыны ис эттилер. Шимди олар учь огьлан - Къуртамет, Мусеввер, Музеир ве бир къыз Гульнаранынъ ана-бабасы, докъуз торун ве беш торундан торуннынъ бахытлы къартана-къартбабасыдырлар. Бундан да зияде бахтны дюнья­да ич кимсе истемейдир. Алла-Тааля Эмине апте ве Сабри агъагъа сагълыкъ берип, оларны джандан севген ве урьмет эткен эвлятлары янында даа чокъ йыллар девамында яша­макъ къысмет этсин!