Чар Русие империясы Къырымны запт этип алгъан сонъ башлангъан иджрет, сонъра миллетнинъ бутюнлейин сюргюн этильмеси, ябанджы юртларда яшамасы тилимизге мисильсиз зарар кетирди. Ватангъа къайтув огърундаки арекет саесинде къырымтатарлар Ватангъа къайтты, бир къарар ерлешип де алдылар. Амма миллий арекетимизнинъ муим вазифелери сырасында медений асабалыгъымызны гъайрыдан тиклев ве бизни миллет эткен эсас хусусиет - ана тилимизни сакълап къалув ве инкишаф эттирюв эмиетли ер алмакъта. Бу саада огюмизде эм колем джеэтинден, эм муреккеплиги ве джиддийлиги джеэтинден буюк иш алып бармамыз зарур. Чюнки миллетимизни ассимиляциягъа огъратмагъа тырышкъан кучьлер макъсадларына деерлик иришеяздылар, халкъымызнынъ баягъы къысмы озь ана тилйни бильмей, анъламай. Эм бунда тек тышкъы кучьлерни къабаатламагъа сыра тюшмей, чокъ шей озюмизге багълы. Эбет, даа якъын вакъытларгъадже мектеплер, дерсликлер ёкъ эди, амма эвде, сокъакъта, иште бири-биримизнен ана тилимизде лаф этмекни кимсе ясакъ этмеди де!
Бундан да гъайры адлиеджи оларакъ шуны къайд этмеге истер эдик ки, Украина Анаясасы ве къанунлары ана тилимизнинъ инкишафына кедер этмей, ресмий тешкилятларда да ондан къулланмамызгъа изин бере. Иште, ресмий весикъаларгъа бир назар ташлайыкъ.
Украина Анаясасында бойле языла:
Стаття 10. Державною мовою в Україні є українська мова.
Держава  забезпечує  всебічний  розвиток  і функціонування української мови в усіх сферах суспільного життя на всій території України.
В  Україні  гарантується  вільний  розвиток,  використання  і захист російської, інших мов національних меншин України.
Бунынъ киби де Украинанынъ «Тиллер акъкъында»ки къанунында къайд этильгенине коре, украин тилйни дев-лет тили оларакъ таныяракъ, Украина джумхуриети мемлекет ичиндеки дигер миллетлернинъ озь тиллеринден къулланмалары ичюн зарур имкянларны яраткъаныны бильдире. Дигер миллетлернинъ векиллери чокълукъны тешкиль эткен ерлерде (шеэр, район, кой ве къасаба Шуралары, кой эали пунктлары) ерлешкен девлет, партия, джемаат органлары, ишхане ве муэссиселерде украин типичен бир сырада дигер миллетлернинъ тиллери де къулланыла биле. Косьтерильген мемурий-территориаль нокъталарда, эали пунктларында чокълукъны тешкиль эткен дигер миллетлернинъ векиллери озь ана тиллерини кереги киби бильмегенлери ве я да шу мемурий-территориаль нокъталарнынъ сынъырларында бир къач миллетлернинъ векиллери топлу суретте яшагъанлары такъдирде къайд этильген орган ве теш-килятларда украин тили я да бутюн эали ичюн келишкен бир тиль къулланыла билир.
Ве ниает, Къырым Мухтар Джумхуриети Анаясасыны талиль эткенде коремиз ки, Къырымда девлет тилинен бир сырада рус, къырымтатар ве дигер миллет тиллерининъ къулланылмасы, инкишаф этильмеси ве къорчаланмасы теминлене.
Къырым Мухтар Джумхуриетинде гражданларгъа мектепкедже бала муэссиселеринде балаларны ана тилинде тербиелев, ана тилйни огретюв, девлет, джумхуриет ве коммуналь мулькиет шекиллеринде арекет эткен окъув муэссиселеринде я да миллий медений джемиетлер вастасында Украина къанунлары ве Къырым Юкъары Шурасынынъ укъукъ актлары иле бельгиленген тертипте ана тилинде окъув укъукъы бериле.
Бойлеликнен, корьгенимиз киби девлет Украинада яшагъан бутюн миллетлернинъ векиллерине озь миллий тиллерини инкишаф этмеге изин бере. Бундан да гъайры, девлет бу укъукъны теминлей, бизге исе тек шу
акъкъымыздан файдаланмакъ ве оны амельге кечирмек къала.
Бундан келип чыкъа ки, къанун къырымтатар тилйни къорчаламакъ ве инкишаф эттирмекни теминлей экен, биз эр анги девлет органларына озь ана тилимизде мураджаат эте билемиз. Буны Украинанынъ «Гражданларнынъ мураджаатлары акъкъында» Къануны да тасдикълай: «Забороняеться вiдмова в прийняттi та розглядi звернення з посиланням на полiтичнi погляди, партiйну належнiсть, стать, вiк, вipocпoвiдання, нацiональнiсть громадянина, незнания мови звернення».
Демек, ич бир девлет хадими ве атта Президентнинъ биле бизим къырымтатар тилинде язылгъан ве берильген, мураджаатымызгъа, беяннамемизге джевап бермектен баш чекмеге акъкъы ёкътыр. Бизден ялынъыз мураджаатнынъ догъру шекильде олмасы талап этиле.
Биз мураджаатларнынъ къырымтатарджа метнини азырладыкъ ве газетанынъ невбеттеки санларында оларны дердж этермиз.