Март 3-нинъ сабасындан джами къуруладжакъ мейдан Къырымнынъ чешит кошелеринден кельген мусульманлар, дигер дин джемиетлерининъ векиллери ве четэльден кельген къырымтатар диаспорасы темсильджилеринен рыкъ толды.
Мусульманлар огюнде чыкъыш япкъан Къырым мусульманларынынъ муфтиси аджы Эмирали Аблаев он йыллыкъ курешнинъ тарихыны къыскъадан айтып, эр кесни бу хайырлы ишнинъ хайырлы башланмасы шерефине дуагьа давет этти. Бундан эвель исе адетимизге коре къурбан чалынды.
Дуа окъулгъан сонъ, топлангъанларнынъ огюнде Миллий Меджлис реисининъ муавини Рефат Чубаров, Бурса буюкшеэр беледие башынынъ темсильджиси Мухсин Озлюкъурт, Бурса къырымтатар дернегининъ башы Аднан Сюен чыкъышта булундылар.
Саат 11 -де Къырым Назирлер шурасынынъ реиси Василий Джарты келип, эр кесни бу къуванчлы куннен хайырлар экен: «Бизим макъсадымыз барышыкълы, чечекленген Къырымны къурмакътыр ве эминим ки, Джума джами Къырымымызнынъ баш ярашыгьы оладжакъ», - деди. Миллий Меджлис реиси Мустафа Джемилевнинъ гъает тесирчен чыкъышыны исе эр кес айрыджа дикъкъат ве козьяшлар иле динъледи.
- Биз бу гъалебеге биззат Василий Джартынынъ джесюрлиги, эрлиги саесинде ириштик. Бу инсан бельки бир чокъ инсанларнынъ къолтутувындан, келеджек сечимлерде реилеринден марум къаладжагъыны биле-биле бу адымны атты. Къырымтатар адети боюнджа акъикъий эркеклерге къалпакъ багъышлайлар, - деди Мустафа Джемилев ве Василий Джартынынъ башына боз къалпакъ кийдирди.
Бунынъ киби де топлангъанларгъа «Крым - дар божий» динлерара кенъешнинъ реиси митрополит Лазарь да мураджаат этип, хайырлы иш ичюн даима курешмек, азап чекмек керек ола, деди.
Сонъра Рефат Чубаров джамининъ темелине къоюладжакъ капсула ичине къоюладжакъ мектюпнинъ метнини окъуп эшиттирди. Келеджек несиллер ичюн бу мектюпни Василий Джарты, Мустафа Джемилев ве Эмирали Аблаев имзаладылар. Метн тантаналы суретте, устюнде Исмаил Гаспринскийнинъ «Тильде, фикирде ве иште бирлик» ве Къырым гербиндеки «Чечекленюв бирликте» сёзлери язылгъан къуту ичине ерлештирильди. Капсуланы миллий урбада йигит ве къыз ерине алып барды. Капсуланы Василий Джарты, Мустафа Джемилев ве муфти Эмирали Аблаев къойып, эль тутуштылар.
- Джамини энди берабер къураджакъмыз! - деди Василий Джарты.