Украина Ички ишлер назирлиги Къырым Баш идаресининъ ресмий изаатында Сарайлы-Къыят мезарлыгъындаки вахшийликке «энъкъастан япылмагъан» дие кесильген къыйметни Къырым мусульманларынынъ Диний идареси акъылгъа ятмагъан шей, дел сая. Бойле фикирге Диний идаре азалары вахшийликни япувда къабаатлангъан ве якъалангъаннынъ мезарлыкъта чамурдан кечалмайып, машинасынен къабирлерге истемеден чарпкъаны киби анълатувыны эшиткен сонъ кельдилер. Чюнки адисе юзь берген куню топракъ къуру ве къабирлер арасындан ич бир ерге токъунмайып кечмек мумкюн эди. Экинджиден, эгер якъалангъан «истемеден» эки къабирни баскъан олса, я булардан 50 метр эректе тургъан даа учь къабир ташлары да парлангъаныны насыл анълатыр? Эм бу къабирлерде тек автомобиль излери дегиль де, аякъкъап излери де бар. Башташларны теперек, оларны  сындырмагъа  тырышкъанлар. Я бу да  «истемеден» япылдымы?
Къырым мусульманларынынъ Диний идареси бойле къапа-къаршылыкъларны козь огюне алып укъукъкъоруйыджыларгъа тафсилятлыджа такъикъат ялмакъ ве адисенинъ асылыны огренмек мураджаатында булуна. Такъикъат нетиджелери боюнджа исе къабаатлыларны Украина Джинаий Кодексине бинаэн месулиетке чекмекни талап эте.
Къырым Муфтиятынынъ матбуат меркези