Олар топракъ участкасыны алгъанда зарур турмуш шараитлеринен илериде теминленеджеклерине инангъан эдилер. Амма арадан 20 йыл кечкенине бакъмадан, вазиет денъишмеди. Электрик ышыкъ ве газ корьмейип оськен балачыкълар сыкъ-сыкъ хасталаналар, акъшам мум чыракъ якъып эв вазифелерини япалар. Эльбет, къышта вазиет даа бетерлеше.
Бу афта Зуя къасабасынынъ сакинлери Акъмесджит - Кефе трассасындаки ёл арекетини токътатып, наразылыкъ акциясы кечирдилер. «Янукович, мы ослепли!», «Могилёв, отзовись, мы не нужны государству!» шиарларынен ёлгъа чыкъкъан адамлар, бойле этип, озь проблемине  украин джемаатчылыгъынынъ дикъкъатыны чекмек истейлер. Авропа стандартлары акъкъында богъаз керген украин акимиети Зуя сакинлеининъ  проблемлерини  аль этмек ичюн олгъаны-оладжагъы 1 млн гривня тапып оламагъаны акъылгъа ятмагъан бир шей.