Белли ки, бу куньлерде Тюркие Баш назири Реджеп Тайип Эрдогъан Украинагъа япкъан зиярети черчивесинде къырымтатар халкъынынъ векиллеринен корюшти. Къырымтатар Миллий Меджлисининъ реиси Мустафа Джемилевнинъ бильдиргенине коре, мезкюр корюшювде халкъы мызнынъ огюнде тургъан энъ кескин меселелерни аль этюв меселеси бакъылгъан. Секиз маддеден ибарет олгъан шу меселелерден бири къырымтатар тилинде окъутыладжакъ мектеплернинъ къуруджылыгъынен багълыдыр.
«Украина бу мектеплерни озь эсабына къураджагъына умюдимиз ёкъ. Сюргюн этильгенлернинъ ерлешювине бу йыл айырылгъан 23 миллион гривнягъа атта бир мектепни биле къурмакъ мумкюн дегиль», - деди М. Джемилев.
Тюркие Баш назиринен корюшювде бунынъ киби де Акъмесджитте Буюк Джума джамининъ къуруджылыгъыны финансирлев меселеси де музакере этильди. Буюк Джума джамини къурмакъ ичюн 30 миллион доллар керек. М. Джемилев джамининъ къуруджылыгъы ичюн пара Тюркие ве Къырым джамилеринде топланаджагъыны эм де етишмеген параны Тюркие укюмети девлет бюджетинден айыраджагъыны бильдирди.
Корюшюв девамында Акъмесджитте къырымтатар медениет меркези, Къырым муэндислик-педагогика университетининъ талебелери ичюн ятакъхане къурмакъ меселелери де кунь тертибине къоюлды. Реджеп Тайип Эрдогъан къырымтатарларнынъ ишбу аятий зарур меселелерини чезмек ичюн Тюркие джумхуриети элинден кельгени къадар ярдым этеджегини ишандырды.
Источник: Янъы дюнья
News maker www.selyam.com
2012-09-21 17:59:50
Раздел: Общество
|
|
Разделы
|
Все комментарии [ 0 ]