Биз Кезлевдеки 18-нджи миллий мектепте окъугъан талебелернинъ ана-бабалары, майыснынъ 6-нда Багъай (Суворово) коюнде (мектебимизнинъ залы олмагъаны себебинден) олып кечкен «Татлы сес» телеяйынынынъ кастингинден наразылыгъымызны бильдирмеге истеймиз. Бу мектюл басыладжагъына эмин олмасакъ биле, язмагъа меджбурмыз.
Баш-башындан жюри азаларынынъ арасында белли ве эр кеске севимли бестекяр ве йырджы Сервер Какура олгъанына севинир эдик. Эм де бу догъру! Чюнки бу инсан балалар ичюн бир сыра йырларнынъ муэллифи ола-ракъ, балаларнынъ табиатыны, ички дюньясы, анъламларыны бильген адамдыр. Амма ич де анълап оламаймыз, не ичюн ве насыл этип жюри азаларынынъ арасына Арсен Османов ве Ридван Халилов тюшкенлер? Олар иштиракчилернинъ устюнден ачыкътан-ачыкъ кульмекте эдилер. Оларнынъ япкъан тазирлери ве «насиатлары» 6алаларны акъаретледилер.
Биринджиден, кастинг вакътында башланмады (балалар саат 9-дан башлап топландылар ве сыджакъта беклеп турдылар). Жюри исе озюни сыкъмайып саат 12-ге келип етишти. Ондан сонъ даа бир саат девамында иштиракчилер анкета толдурдылар ве
сабырларыны топлап невбетлерини бекледилер. Кастинг уйледен сонъ, ниает, башланды.
Вокал номинациясына балачыкъла-рымызны мектебимизнинъ музыка оджасы Гульнара Ибрагимовна Адильшаева азырлады. О алий севиели, теджрибели оджа, чокъ йыллардан берли балаларнен чалышмакъта. Озю де къырымтатар халкъ йырларыны, земаневий йырларны да яхшы биле. Сеси белли йырджыларымызнынъ сесле-ринден эксик дегиль. О 18 бала азырлап кельди. Ич бириси ярыштан кечмеди. Ойле олурмы?! Бу балалар арасында музыканен темелли огърашкъан талебелер де бар эди.
Бильгенимизге коре, жюри азалары йырджы, хореограф киби адамлар олмалылар. Тойда йырлагъан адамдан жюри азасы олмаз! Не ичюн жюри азаларынынъ арасында Р. Меметов, Э. Асанов, У. Кенджикаева киби мутехассыслар ёкъ? Къайда С. Какура?
Конкурскъа торунларыны кетирген 75 яшлы къартбаба жюриге: «Пек кечиктинъиз», — дегендже, Ридван Халилов онъа энди Евпаториягъа ич кель-мейджеклерини ачувнен бильдирди. Дерсинъ, онынъ кельмеси бизлер, кезлевлилер, ичюн буюк байрам.
Кастингден эвель балалар интервью бердилер. Ана тилинде темелли джевап берген балаларнынъ эписи миллий мектебимизнинъ талебелери эди! Амма не ичюндир 2-нджи тургъа ана тильни ич бильмеген балалар кечти! Бизим балаларгъа исе жюри азалары
келишмеген ве ляйыкъ олмагъан суаллер берип, балаларны ёлдан урдылар (меселя, «кийген урбанъ шиирге келишмей»). Балаларымыз жюри азалары берген суаллерге къырымтатар тилинде толу джеваплар бердилер.
Кастингнинъ экинджи куню Кезлевдеки кастинг июньде косьтериледжегине бакъмадан биз кене де APT каналынынъ телеяйынларыны коре эдик. «Zaman» хаберлер яйынында бизим мектебимиз акъкъында айтылгъаныны эшитип шаштыкъ: «Кезлевдеки миллий мектепнинъ талебелери ана тилини эм бильмей, эм де анъламайлар». Бу сёзлер балаларымызны ернен те-гизледи. Бундан сонъ бизлер бойле нетиджеге кельдик: бизим балаларымыз белли адамларнынъ балалары дегиль, эвельки кастингдеки гъалиплер-нинъ къардашлары да дегиль (Багъчасарай регионындаки киби).
Шеэримизде 18 мектеп чалыша. Тек бизим мектепнинъ миллий мектеп статусы бар. Биз балаларымызны шу мектепке баламыз тувгъан тилини тек шиве шекилинде дегиль де, эдебий шекильде бильсин деп бердик. Шунынъ ичюн биз, ана-бабалар, «Zaman» телеяйынындан ресмий реддиени (официальное опровержение) талап этемиз.
Ана-бабалар адындан
Э.Д. Ресутова,
Ш.Э. Люманова,
Л.Р. Меметова,
Г.Р. Мустафаева,
Л.С. Сейталиева