Биринджиден къайд этмеге истер эдик ки, майыснынъ 6-нда Багъай (Суворово) коюнде сечим саат 10-гъа къайд этильген эди, ве балалар саат 9-дан топланып башлагъанлары олар программаны пек севгенлерини ве сабырсызлыкънен беклегенлерини даа бир кере тасдикълай.
Бильмеймиз не ичюн, амма телевизион группамыз кирагъа алгъан «Volkswagen» автобусы шу куню ёлда бозулды. Бу немселер яхшы машиналар ясамакъны ойле де огренмедилер!
Шу себептен биз керчектен де кеч къалдыкъ, амма буны ич кимсе махсус япмады, бизлерни беклегенлерини пек яхшы биле эдик ве олдукъча ашыкъмагъа тырыштыкъ. Лякин, занымызджа, музыка оджасы Гульнара Ибрагимовна Адильшаеванинъ бир къач талебеси сечимден кечкени такъдирде, бу акъта, бельки, де, сёз юрсетильмез эди.
Экинджиде, «Не ичюн ве насыл этип жюри азаларынынъ арасына Арсен Османов ве Ридван Халилов тюшкенлер?» - деп сорайлар урьметли мектюп муэллифлери. «Не ичюн» деген суальге бойле джевап бермек истеймиз: асылында бу лейха, бу программа не ичюндир Ридван Халиловнынъ акъылына кельди, о «балаларнынъ табиатыны, ички дюньясы, анъламларыны бильген адам» оларакъ, эвлятларымызгъа озь истидатынен пайлашмакъ ичюн «Татлы сес» программасыны мейдангъа кетирди. Белли йырджымыз Арсен Османов исе бизлерге ярдым къолуны узатып, программанынъ омюрге кечмесине буюктен-буюк иссесини къошты. Онынъ теджрибесинде эм бизде, эм де Сервер Какурада шубе ёкъ. Сёз сырасы, айны Сервер Какура жюри башы оларакъ Арсен Османовгъа Кезлевге бармакъны теклиф этти. «Тойда йырлагъан адамдан жюри азасы олмаз!», - дениле мектюпте. «Р. Меметов, Э. Асанов, У. Кенджикаева киби мутехассыслар» буюк мувафакъиетлер иле тойларда йырлайлар, чалалар, чыкъышта булуналар. Асылында бизим санатчыларнынъ 99% тойларда иштирак эте, ве бу буюк теджрибедир.
Догърусыны айтсакъ, бу мектюп бизлерни буюк айретте къалдырды. «Конкурскъа торунларыны кетирген 75 яшлы къартбаба жюриге «Пек кечиктинъиз» демекнен берабер «Гъалиба бир ерлерде пиво ичип кельдинъиз» сёзлерини де къошты, лякин бу ибаре ич бир ерде анъылмай, иште, язмагъа ниетленген олсанъыз, эр шейни язынъыз. Языкъ ки, балаларнынъ тиль билюв се внеси керчектен де гъает алчакъ эди, буны биз эфирге чыкъаджакъ «Татлы сес» программасындан корермиз, эр шей камераларгъа чекильди.
АТР телеканалы бутюн къыйынлыкъларгъа бакъмадан, балаларымыз ичюн янъы программаны кейфиетли япмагъа тырыша, биз Кезлевден гъайры Къырымнынъ даа 10 чешит меркезлеринде олдыкъ, бизлерни мектеп мудирлери, ерли ве региональ меджлис реислери къаршылап, бу программагъа юксек къыймет кестилер. «Бизим балаларымыз белли адамларнынъ балалары дегиль, эвельки кастингдеки гъалиплернинъ къардашлары да дегиль (Багъчасарай регионындаки киби)» деп языпа мектюпте. Эмин олунъыз ки, сизинъ урьметинъиз бизлерни ич меракъландырмай, бизлерни айрьщжа эр бир бала меракъландыра ве биз тек баланынъ чыкъышына къыймет кесемиз.
Бу вакъиа шуны косьтерди ки, ана тили, эдебият дерслерине ве балаларгъа ашлангъан миллий тербиеге чокъ зияде дикъкъат айырмакъ керектир. Огюнъизде тургъан меселе мына бойле мектюплернен чезильмей. Сечим турлары девамында телевизион группамыз 600-ге якъын баланы козьден кечирди ве эминликнен айтмагъа мумкюн ки, тилимизнинъ вазиети гъает хавфлы алда! Биз буны ачыкътаначыкъ айтамыз!
Бу ерде Судакъ мектебининъ талебелерини айрыджа къайд этмеге мум-кюн ве июнь 13 куню саат 19-да АТР телеканалында «Татлы сес» яйыныны сейир этинъиз, эфирде Судакъ регионы оладжакъ ве оджаларнынъ ишине озюнъиз къыймет кесерсиз.
Ве энъ сонъунда: биз ана-бабаларнынъ къасеветлерини пек яхшы анълаймыз, чюнки балалар косьтерген нетиджелер оларны тааджиплендирген. Лякин биз тек къыймет кестик, ве эминмиз, бунынъ себебини бизде дегиль де, бельки, шу балаларны огреткен оджалардан къыдырмакъ керектир. Унутмайыкъ ки, бойле тедбир ильк кере отькерильди ве онынъ энъ буюк эмиетлериден бири — оджаларнынъ ишине къыймет четтен кесильди. Бу мектюп кимерси ана-бабалар бу ишлерден мемнюн олмагъанларыны косьтере.
Келинъиз, бу вазиеттен бирлик-бераберликте чыкъмагъа тырышайыкъ, АТР телеканалы ишбирлик ичюн ачыкъ ве биз сизлерни студиямызгъа давет этемиз, «Татлы сес» программасынынъ Багъай коюндеки сечим турыны тафсилятлы шекильде, ашыкъмайып талиль этейик.