Юкъары Шурасынынъ реиси ве Къырым муфтийи сонъки вакъытта ярымадада джамилер якъылгъаныны укюм этерек, бу адиселер провокация олгъаныны къайд эттилер. Олар бу фактларгъа эм укъукъкъорчалайыджы органлар, эм де Къырымнынъ бутюн джемаатчылыгъы энъ серт шекильде къыимет кесмек кереклер, деп айттылар. Бундан да гъайры, корюшюв девамында Акъмесджит районынынъ Мамут-Султан коюнде янъы джамининъ къуруджылыгъы меселеси музакере этильди. Анатолий Могилёв ерли сакинлер къаршы олмагъан такъдирде бу лейханынъ омюрге кечирилювине ярдым этмек кереклигини къайд этти. Амма ерли джемаат янъы джами не ерде къуруладжагъыны озю бельгилемек ве ерли озь-озюни
идаре этюв органларынен бу меселени уйгъунлаштырмакъ керек.
Тарафлар о ерде тек янъы джами дегиль де, даа православ ибадетханесини де къурмакъ зарур, деген фикирге кельдилер. «Бу диний иншаатлар Къырым яшларыны медений ве маневий джеэттен тербиелев меркезине чевириледжеклер», - деди Анатолий Могилёв.