Бундан тамам 40 кунь эвельси, яни июнь 18-де Джанкой шеэринде къырымтатар миллетине менсюп рухий хаста, психоневрологик диспансернинъ эсабында тургъан Сервер Ибрагимов беш яшлы Виктор Шемякиным опьдюрген эди. Бу адисени Къырым казаклары аман Ислям радикализминен багълап, яйгъара къопардылар, халкъымыз адына чиркин лафлар айттылар.

Бу афта июль 29 куню «Соболь» адлы Къырым казаклар джемиетининъ азалары байракъларына къара шеритлер багъ­лап, «Ислям радикалларынынъ элинден эляк олгъан рус балаларынынъ рухларыны анъмакъ ичюн» Ялтинская сокъагъы 22, яни Буюк джами къуруладжакъ ерге келип, тенбие акциясыны кечирип, кене бефтан къабаатлавлар, къаралавлар ягъдырдылар. Балалар ичюн яс тутмагъа ярашыкълы урбалар кийип кельген къызлар вира фото ве видео камералары огюнде озьлерини косьтере, йигитлер исе: «Нет мечети на крови рус­ских детей: Андрея Западного, Анжелы Стрелец, Артура Зиненко, Виктора Шемякина», «Требуем убрать из информа­ционного пространства говорящие голо­вы исламского радикализма», «СБУ — пособник и покровитель исламского ра­дикализма» деген шиарпар тута. Казак джемиетининъ етекчилери мантыкъсыз, ич бир къалыпкъа сыгъмагъан лафларны айтып, атта Къырым ич бир заман къырымтатар халкъынынъ топрагъы олмады, бу — русларнынъ юртудыр, де­ген акъылсыз фикирлерни сеслендирмектен де утанмадыпар. Оларнынъ айткъанларына коре бу, казакларнынъ тен­бие (предупредительный) акциясы олып, ислям радикалларына нисбетен чаре корюльмесе, даа да кескин арекетлерге кечеджек экенлер.

Къатильнинъ миллети олмай. Шимди лаф юрсетильген къатиль исе рухий хаста адам. Беш яшлы баланынъ олюмине бутюн къырымтатарлар ве умумен бутюн къырымлылар яндылар. Алла ана-бабасы ве якъынларына сабыр берсин. Амма топрагъы айырылмасы энди беш йылдан берли созулып кельген Буюк джамининъ бунъа не алякъасы бар? Не, джамилерде кимнидир ольдюрмеге, дженклешмеге огретелерми ёкъса? Не ичюн биз башкъа динлилер ибадетханелерининъ къуруджылыгъына къаршы чыкъмаймыз? Чюнки бу акъылсызлыкътыр. Къырымда асырларджа кильселер, синагогапар, кенаса ве джамилер ян-янаша эйи къомшу олып арекет эткенлер. Казакларнынъ тюшюнильмеден япылгъан бойле акциялары даваларнынъ къопмасына себепчи олып, ярымададаки барышыкъкъа зарардан башкъа ич бир шей кетире бильмез.