Президентнинъ Меджлис ёлбашчыларынынъ позициясы «бир шейге ярамагъаны» акъкъындаки элемли сёзлери бир чокъ суаллер догъурды. Олардан эсас суаль будыр: Виктор Фёдорович озюне хае къабадан-къаба дипломатик ел иле къырымтатарларны онъа керек олгъан ёнелиште кетмеге меджбур этмек ниетинде дегильми, аджеба?
«Обком» Къырым ёнелишиндеки дава кучьленгени-кучьленмегенини бильмек ичюн халкъ депутаты Мустафа Джемилевнен багъланды. Меджлис ёлбашчысы Акъмесджиттеки ава лиманында экенде бизим суаллеримизге джевап берди.
— Мустафа агъа, бир тарафтан Меджлистен, дигер тарафтан Банковаядан чыкъкъан тенкъидий сёзлернен алмашувдан сонъ бир афта кечти. Бу вакъыт ичинде вакъиалар насыл тюс алды! Кергинликнинъ опони алмакъ ичюн бир де-бир музакерелер алынып барылдымы!
—   Керчегини айтсам, мен бильмейим. Бу куньлерде мен башкъа ерде эдим ве Акъмесджитке даа демин келип чыкътым. Амма бильгениме коре, эльчиханелерден телефон ачып башлагъанлар. Авропа Шурасындан кельген эльчи меним муавиним Рефат Чубаров иле корюшип, бунынъ себеплерини ачыкъламасыны риджа эткен. Тюркие, Америка          Къошма Штатлары, Франциянынъ эльчилеринен де корюшювлер олгъан, олар да вазиетнен меракълангъанлар.
— Яни Меджлиснинъ нокътаий-назарынен, мындаки вазиетнен эсасен четэль дипломатик даирелерининъ векиллери меракъландылар, дейсинъизми?
-  Эбет, олар Къырымдаки вазиет осаллашеа, бунынъ нетиджелери насыл ола биледжегини украин сияеетчилеринден яхшыджа анълайлар.

—  Президент мемуриетининъ башы Сергей Лёвочкин Януковичнен корюшюв даа олмагъанда Меджлис корюшювге къатылмаса, бу алда онъа нисбетен «адекват адымлар» оладжагъыны айткъан эди. Акимиет тарафындан бу «адымлар» энди атылдымы ?
—  Ёкъ, «адекват адымларны» даа корьмедик. Амма бакъаджакъмыз... О (Президент — муарр.) шимди раатлана, сиз айткъан насыпдыр адымпаргъа сыра кельмей гъалиба.
—  Кутьле нокътаий-назарындан алгъанда дава Януковичнинъ Мемуриети ве Меджлис арасында кечеята. Амма олар биле-биле Меджлиснен дегиль де, Меджлисте айны сизнен курешелер, деген тахмин догъмаймы! Банковая Меджлистеки кучьлерни парчалап, нетиджеде, сизинъ еринъизге башкъасы сайланмасына иришеджек ола, деген вариантны фараз этмейсинъизми ?
— Бойле сценарий Русиеде энди чокътан ишлеп чыкъылгъан эди. Эгер де Янукович Путиндже сиясет ёлунен кетеджек олса, ихтимал, бойле шей ола биле. Асылында оларгъа тез разылашкъан Меджлис, итааткяр къырымтатарлар кереклер. Меджлис разылашмай экен, демек, олар озюне келишкен адамларнен иш корелер. О адамларны  къырымтатарларнынъ  векиллери демеге ич бир эсас ёкътыр. Бу - оларнен бир фикирде олгъан адамлардыр.
—  Яни меркезий акимиет ве онынъ Къырымдаки адамлары вазиетни яхшылаштырмакъ ичюн бир тюрлю арекетлер япмайлар...
— Ёкъ, оларнынъ тарафындан ич бир адым япылмады.
—  Я сизинъ тарафынъыздан ?
— Корюшювимиз олып кечмеген сонъ биз Президентни ким алдаткъаныны анълатып мураджаат яптыкъ. Мураджаатта Президенттен къырымтатарларнынъ векялетли органы — къырымтатар халкъы Меджлисинен эвельден бельгиленген корюшювни беклегенимизни бильдирдик. Шимдилик бир дебир джевап ёкътыр.
— Сизде акимиет зыддиетни даа зияде бетерлештирмеге тырыша, деген фикир догъмадымы ?
—  Ёкъ, бойле фикир догъмады. Эм бойле шей акъкъында эшитмедим.
—  Яхшы, амма Янукович Меджлисни хашие этильген (маргиналь) даваджы бир муэссисе, дел косьтермеге тырышкъан тешкилятларнынъ векиллерини давет этип, оларнен иш тутаджакъ ола, деген фикирнен разысынъызмы ?
—  Ёкъ, бу даа насыл бир тешкилятлар ? Эки-учь адамгъа насылдыр бир тешкилят сыфатында бакъмакъ, оларгъа джиддий къыймет кесмек олмаз.
—  Къырым Назирлер шурасынынъбашы Василий Джарты бу адисеге дайр озь нокътаий-назарыны анълатмагъа тырыштымы ?

— Януковичнен корюшюв олгъан сонъ, экинджи куню В. Джарты Ильмий Уме-ровны Багъчасарай район девлет мемуриетинде такъдим эткен эди. О анда чыкъышта булунаракъ, Меджлис озюни гуя ки конструктивсиз алып баргъаны, акимиет проблемлерни аль этмекни тюшюнген бир вакъытта Меджлис Президентнен корюшювни дикъкъатсыз къалдыргъаны акъкъында айткъан. Бун-дан сонъ район шурасынынъ башы Александр Таряник эр бир меселени Багъчасарай региональ меджлисинен бераберликте чезмеге тырышаджагъыны айткъан. Иште, насылдыр лафларгъа бойле бир озюне хае дарбе олды...
— Белли ки, Авропа Шурасы, Авропа Шурасы парламент ассамблеясы (ПАСЕ) ве дигерлеринен мунасебетлеринъиз яхшыдыр. Шимди акимиет Меджлисни четке сюрмеге тырышкъанда, четэльдеки аркъадашларынъызнынъ ярдымына умют беслемек сырасы келеми ?
—  Даа майыс 18-де, Президентнен олмагъан корюшювимизден ве бундан сонъраки вазиетнинъ кергинлешмесинден алдын биз резолюция къабул этип, къырымтатар халкъынынъ озь ана-Ватанында акъ-укъукъларыны гъайрыдан тиклемек ве Украинада онынъ хавфсызлыкъ ве инкишафына кефилликни теминлемек меселелери боюнджа Халкъара форумны чагъырмакъ зарур олгъаныны айттыкъ. Бу форумгъа ПАСЕ, Авропа парламенти, БМТ структураларыны ве дигер нуфузлы халкъара тешкилятларны, дюньяджа белли сиясет ве джемаат эрбапларыны давет этмекни козьде тутамыз. Иште, бу ёнелиште чалышаджакъмыз. Бундан гъайры, август 28-29 куньлери оладжакъ Къурултайда бу меселе де илле бакъыладжакъ.
—  Ве сонъки суаль. Бу афта ичинде сиз ве сизинъ Къырымдаки аркъа-дашларынъыз укъукъкъорчалайыджы органларнынъ алельхусус дикъкъатыны сездинъизми ?
—  Бугунь саба манъа Къырымдан телефон ачтылар ве миллети къырымтатар олгъан милиция хадимини, ич бир себепсиз, иштен бошаткъанларыны, ондан рапорт язмасыны талап эткенлерини бильдирдилер. Мен Къырымгъа къайткъан сонъ бу меселенен огърашаджа-гъымны айттым. Бойле шейлер не ичюн олаяткъаны шимдилик анълашылмай: меселе миллий менсюпликтеми я да бунынъ башкъа бир себеби бармы ?  Манъа, айны вакъытта, къырымтатарлардан олгъан бир къач мемургъа ультиматум къойгъанлар: олар я Регионлар партиясына киреджеклер я да иштен бошатыпаджакъ экенлер, деген хаберни де бильдирдилер.