Къарышыкъ къоранталар исе умумен къырымтатар халкъынынъ башкъа миллетлер ичинде къарышмасына алып келе. Бойле къоранталар акъкъында пек чокъ языла ве айтыла, амма сонъки вакъытта аилелер энди славянларнен дегиль, тюрк, арап, иорданиялыларнен де къурулып башлады. Бу миллетлернинъ векиллери Къырымда чешит макъсадларнен, яни бизнес, окъув, миссионерлик вазифелеринен булунмакъталар. Баягъы вакъыт ярымадада булунгъан бу эркеклернинъ арасында намуссыз сойлары да аз дегиль, иште, олар бизим къадынларгъа эвленмекни теклиф этелер ве атта бутюн адетлер боюнджа никях да къыйдыралар. Лякин мында иш муддетлери биткен сонъ къадынларыны, дюньягъа кельген балаларыны да ташлап кетелер. Базы бирлери артыкъ ич Къырымгъа къайтмайлар. Никях л ары ЗАГС идарелеринде къайд этильме-ген бу къадынлар энди не япсынлар? Я да бойле аилелерде догъгъан балалар гъурбетте къалып кетселер? Инанынъыз ки, къадынларымыз бу месе-
лелернен огърашмаларыны ич истемез эдик.
Кеченлерде «Къаймакъан» тарафындан илян этильген «Къоранта» программасы ильк сесленювлерни алып башлады. «Сёз берди», «ишандырды», «алдатты», «ташлап кетти» — мектюп ве мураджаатларнынъ къыскъа мундериджеси, иште, бойле. Халкъымызнынъ инанмакъ чизгиси акъкъында чокъ айтмакъ мумкюн, амма мунафыкълар озьлерини Алланынъ садыкъ къулы этип косьтеререк, заваллы къадынларны алдатапар да!
Биз бир сыра мураджаатларны тапиль этип, бойле хулясагъа кельдик: Къырымгъа кельген четэлли эркек ильк-эвеля аиле къурмагъа ашыкъа. Бу онъа керчектен де янында якъынлары олмасыны истегени ичюн керекми? Екъ, тек бизнесининъ юрюшмеси ичюн экен. Эм къадынлар чокъусы алларда бойле эркеклернинъ ортакълары, ярдымджылары дегиль де, садедже сипириджилери, ашчылары, эгленджелери, терджиманлары оларакъ хызмет этелер. Чюнки ябанджылар рус тилини пек зор огренелер. Мында исе эм тюркче анълагъан, «тюрк масалларына» инангъан терджиман, эм къадын апма-азыр. Я къадын насыл инанмасын ки, эр­кек Алланынъ огюнде, шаатларнынъ янында емин этти де!
Психик агърыларгъа даа маддий проблемлер де къошула — бойле бабалардан не ярдым алырсынъ, не де алимент талап этерсинъ. Къырылгъан такъдир, аджджы козьяшлар...
Шунынъ ичюн къадынларны бойле никяхкъа разылыкъ бермезден эвель яхшы этип тюшюнильген къарар алмаларына чагъырамыз. Къырым мусуль­манларынынъ диний идареси исе озь невбетинде сизлерге эр тарафлы ярдым этмеге тырышыр. Сизни алдатмакъ пешинде олгъанларны сонъундан де­гиль де, куньэвельден фаш этип джезаламакъ мумкюн олур. Эгер бойле алгъа тюшкен киби олсанъыз, азачыкъ шубенъиз олса биле аман муфтияткъа мураджаат этинъиз ве мында сиз юридик консультация алырсынъыз. Эгер четэлли бир эркекнинъ ниетлери керчектен де хулюс къальптен олса, онынъ весикъаларыны бакъар, якъынджа танышыр ве ярдым этермиз. Табиий ки, бутюн булар тек сизге белли сыр олур.

Сайгъы иле Къырым мусуль­манларынынъ диний идареси.
Адресимиз: Акъмесджит, Курчатов сокъагъы, 4.  (0652) 274353