Афсус ки, тилимиз бугунь хастаханеде агъыр алда яткъан хастаны анъдыра. Базы бир «экимлер» чокътан тилимизге укюм чыкъарып, онынъ ольмесини беклейлер... Кеченлерде ана тилимизде чыкъкъан газеталарнынъ биринде ватанпервер семетдешлеримизден бири койдешлери не ичюн ана тилимизде чыкъкъан газета ве меджмуаларгъа абуне олмагъанларына айретте къалып, -себебини бильмек ичюн эв-эвден юрип, бу меселенен меракълангъан. Базы бир койдешлери: «Биз бу неширлерни окъуп оламаймыз, чюнки тили-мизни о къадар севиеде бильмеймиз, оларны окъумакъ биз ичюн зор», — деп джевап бергенлер. Масхаралыкъ! Ойле шей олурмы?! Я ана-бабалары, баба-деделери къырымтатар эди де!!! «Озь ана тилинден вазгечкен адам,ана-бабасындан да вазгечер!», — дегенлери ерли олса керек! Яни озь тилини севип-саймагъан адам озь ана-бабасына нисбетен хиянетлик япа билир! Бугуньки куньде бойле инсанларгъа ана тилини огренмеге, оны мукеммель бильмеге ким кедер эте? Совет укюмети, миллетимизни олюмге укюм эткен эди, я о энди чокътан ёкъ да?! Ярым асыр сюргюнликте яшагъан миллетимиз мектеплерсиз, университетлерсиз озь тувгъан тилини сакълап, Ватанларына авдет этти. Шимди Къырымда эр бир мектепте ана тили дерслери кечириле, миллий мектеплеримиз бар, даа десенъ Февзи Якъубов ачкъан КъМПУмиз бар! Озьбекистанда екяне «Ленин байрагьы» чыкъа эди де... Шимдики куньде, Аллагъа шукюр, ана тилини бильмек ичюн эр шей мевджут!  Биз исе....Нени беклеймиз, достларым?-Ана тилини гъайып эткен миллетнинъ келеджеги ёкъ!

Гузель ана тилимиз!

Давран, достум, семетдешим! Уян агъыр юкъудан. Тувгъан тилинъ хавф астында, Къомшу халкълардан утан!
Бу миллетлер   бизге бакъып, Устюмизден кулелер. Олар тувгъан тиллерини Урьмет этип, севелер.
Бала-чагъа — бутюн миллет, Къайда олсун - эр ерде, Бир-биринен корюшкенде Озь тилинде лаф эте...
Бизлер исе авдет этип, Санки акъыл шашырдыкъ. Татлы, аэнкли лисанны, Явур тильге денъиштик...

Эгер яшларымыз бугунь, Тилин бильмей, унутса, Аджыныкълы алда къалыр, Бизим миллет Къырымда.
Давран, достум, вакъыт кете, Сакъавланып башладыкъ. Юрткъа къайтып, языкъ олсун, Явур тильге алдандыкъ.
Осман, Мерьем, Айшелерни, Мени, сени, шубесиз, Миллет этип бирлештире, Гузель ана тилимиз!