Джами этрафында яшагъан джемаатнынъ чокъйыллыкъ арекетлери зая кетмеди, мусульманлар энди беш вакъыт намазларыны къылмакъ ичюн мында келе билелер. Январь 22 куню олып кечкен джемаат топлашувында джами ичюн месуллер тайинленип, Къырым мусульманлары муфтилигининъ векиллери исе анахтарларны бердилер. «Молла Мустафа» джамиси Багъчасарайда чалышкъан дёртюнджи джамидир. Булардан Хан Джами, Тахталы Джами ве «Молла Мустафа» джамиси эскиден къурулгъан джамилер олып, Ханчайыр мааллесиндеки(6-нджы микрорайон) джами янъыдыр. Мусульманлар топлу яшагъан даа бир маалле Джейханда джами ёкътыр, амма онынъ къуруджылыгъы акъкъында къарар алынды.
Сюргюнликтен эвель Багъчасарайда 30 джами бар эди.