Наврез  
                            
Бувлангъан топракъкъа санчылса сабан,           
Чёллерге къойларын джайдырса чобан,              
Севинем корил мен Наврез кельгенин,
Аятны селамлап кунеш кульгенин.

Наврез о - тарлагъа биринджи адым,               
Юректен сездире хош эмек дадын.                  
Наврез о — ильк баарь байрамы бизде,
Эн джошкъун дуйгъулар башлай Наврезде.

Шу куню дюньягъа сукъланып кезем,
Эр ерде ильк баарь къокъусын сезем.
Наврез о - кетире юрткъа ярашыкъ,
Мен онъа яшлыкътан олгъаным ашыкъ.