Мен бир шейни анълап оламайым, бугунь бизлер неге бакъып иш тутмалымыз, яшадыгъымыз укюметкеми, ёкъса Тюркие, Романиягъамы? Эгер бизим озь укюмютимиз олгъан олса, бу башкъа сыра эди. Бугуньки куньде олды-оладжагъы он беш миллий мектеп олгъанда, латин элифбесине насыл кечмек мумкюн? Эгер де биз шимди латинге кечсек, бир къач йылдан халкъымыз не газета, не китапларны окъуп олур. Чюнки халкъымыз бунъа даа азыр дегиль. Бугуньки куньде анда-мында латин элифбесинде чыкъкъан макъалелерни окъугъан адам пек аз, атта дер эдим ки, оларны кимсе окъумай. АТРде берильген язылар да тыпкъы ойле. Насыл олса да, бу меселени бильгили инсанлар, алимлер чезмек кереклер. Миллий Меджлис, Къурултай алимлерсиз бир шей япып оламаз.
Мени шимди башкъа бир суаль раатсызлай: я, Украина укюмети бизим латинге кечмемиз акъкъында не тюшюне? Онъа бу насыл тесир этеджек?
Менимдже, миллий меселемизни чезмегендже биз бир шей япып оламамыз.