Дерслерни рессам Арсен Алиев алып барды. Аджайип кунешли ава, хош ве гузель муит, кулерюзьлю адамлар, янъы танышувлар — буларнынъ эписи усталыкъ дерслери иштиракчилеринде унутылмаз дуйгъулар къалдырды. Тедбирге баягъы адам тешриф буюрды. Оларнынъ эписини - джынсы я да миллетинден къатий назар — лякъайд олмагъан гонъюллери бирлештире. Хайрие тедбирининъ баш тешкилятчысы Нара Нариманова: «Сув ве боялар, музыка ве чай — буларнынъ эписи гонъюль ичюн фитнестир. Бундан да гъайры, сизни мытлакъа мукяфаты олгъан, чокътан-чокъ тебессюм ве бахт багъышлагъан лотерея беклей!», - деп Интернет вастасынен адамларны давет этти.
Иштиракчилер усталыкъ дерслери ичюн 50-шер гривна бердилер. Пара эки бала-нынъ анасы, Джанкой районы Крымка коюнинъ сакини Диляра Абдурахманованынъ тедавииленмеси ичюн топланды. Адамлар эм хаста къадынгъа ярдым эттилер, эм де Эбру — сув узеринде ресим япув усулларыны огрендилер. Меселя, Эбру боюнджа усталыкъ дерслерине «Кпорт» веб-студиясынынъ деерлик бутюн коллективи кельди. Олардан гъайры Зарема Хайрединова ёлбашчылыгъында чалышкъан «Манюня» балалар студиясынынъ талебелериде фааль иштирак эттилер. Тедбир иштиракчилеринден Эльвиса Татарованынъ чёльмекчилик ишлери эр кесни аиретте къалдырды ве аукционда олардан баягъы келир эльде этильди. Аукцион ичюн татлы ашларны Диляранынъ койдеши Зера Аджиумерова азырлады. Крымка коюнден кельген талебелернинъ япкъан ресим ве ильванлары да аукционда сатылды. Тедбирге иджадий адамларны джельп этюв ишинде Лютфие Зодиева ярдым этти.
Шенъ аукцион ве усталыкъ дерслери нетиджесинде 3165 гривна топланды. Бутюн пара Диляранынъ догъмуш татасына такъдим этильди.