Майыс 22 куню Къарасувбазарда 2-нджи халкъара тюркшынаслыкъ конференциясы озь ишини башлады. Бекир Чобан-заденинъ яратыджылыгъында лингвистик-фельсефий бакъышлары, тюркшынаслыкъ саасындаки тедкъикъатлары, Къырым Меркезий Иджра Комитетинде фаалиети, къумыкъ ве къумыкъ тилининъ ролю ве эмиети боюнджа фикирлери, Бекир Чобан-заденинъ Азербайджан ве Дагъыстан илимлерине хызмети ве умумен тюркшынаслыкъ, тюркий халкъларнынъ тарихы, медениетине дайр муим меселелер боюнджа марузаларнен чыкъышта булунмакъ ичюн конференциягъа Тюркие, Озьбекистан, Русие, Азербайджан, Дагъыстан, Къазахистан ве Украина девлетлеринден алимлер Бекир Чобан-заденинъ догъгъан шеэри Къарасувбазарда топландылар.
Адети узьре конференция иштиракчилери ве мусафирлер Бекир Чобан-заденинъ эйкелине чечеклер къойып, марузаларгъа кечтилер. Оларны салонда Къарасувбазар шеэрининъ ёлбашчысы Альберт Кангиев, Бекир Чобан-заде фондынынъ тэсисчиси Ресуль Велиляев, Бутюн дюнья къырымтатарлар конгрессининъ президенти Рефат Чубаров, шаир Аблязиз Велиев Азербайджан Илимлер Академиясынынъ ильмий хадими Эльмира Абасова, Тюркиеден доктор Нури Къавакъ, Къазахистандан тарих илимлери докторы Закиш Садвокасова. Русие Илимлер Академиясы Тильшынаслыкъ институтынынъ профессоры Марк Дьячков селямладылар.
Бекир Чобан-заде догъгъанынынъ 120 йыллыгъы къайд этильген бу куньлерде отькерилеяткъан бу конференцияда Озьбекистан ве Къазахистан алимлерининъ иштиракини айрыджа къайд этмек мумкюн олса, Бакудан Къырымгъа учакъ билетлерининъ фияты эки къат арткъаны себебинден бир къач накълие васталарыны денъиштире-денъиштире кельмек зоруна къалгъан азербайджанлы алимлернинъ Бекир Чобан-заде шахсына буюк урьметлеринден деляпет бергенини танымалымыз.
Айны шу куню Къарасувбазарда топлангъан Къырым кутюпханеджилери Къырым Медениет назирлиги, И. Гаспринский адына джумхуриет къырымтатар кутюпханеси ве Къарасувбазар кутюпханелер
системи бирликте «Бекир Чобан-заденинъ дюньясы» эдебий окъувларны отькердилер.
Конференциянынъ экинджи иш куню Багъчасарайда девам этти. Исмаил Гаспринский эв-музейинде азербайджан, озьбек, къазах алимлери латин уруфатына кечюв теджрибесинен пайлаштылар.
Бугунь конференциянынъ сонъки куню. Уйлеге къадар марузалар динъленип ве музакере олунып, уиледен сонъ кене Бекир Чобан-заде эйкелине чечеклер къоюлды. Акъшам исе Бекир Чобан-заде мукяфатыны такъдим этюв тедбири такъдим олунып, конференция иштиракчилери ичюн тантаналы концерт берильди.
Источник: Янъы дюнья
News maker www.selyam.com
2013-05-24 17:57:29
Раздел: История
|
|
Разделы
|
Все комментарии [ 0 ]