Онда бутюн Украинадан кельген чешит миллий коллективлер озь санатларыны нумайыш этелер. Фестивальде Къырымны «Джемиле» оюн ансамбли, «Татлы сес» конкурсынынъ гъалиби, яш йырджы Айше Рамазанова, «Заман» чалгъы такъымы ве халкъ йырлары иджраджысы Эльвира Сарыхалил ве дигерлери темсиль этелер.
Шимдининъ озюнде ич бир шубесиз айтмакъ мумкюн ки, фестивальнинъ энъ парлакъ адисеси оларакъ къырымтатар артистлерининъ, шу
 джумледен «Джемиле» балалар ансамблининъ чыкъышлары танылды.
 - «Краiна мрiй» ойле фестиваль ки, анда сейирджилернинъ дикъкъатына бир де-бир халкънынъ аньаневий фольклор нумюнелери теклиф этиле. Иште, биз шу фестивальде халкъымызнынъ медениетини такъдим этемиз. «Краiна мрiй»ге къатылгъанымыз биринджи кере дегиль ве биз
адетте аньаневий оюнларымыздан «Агъыр ава ве Къайтарма»ны, «Тым-тым»ны, «Йигитлер оюны»ны, «Назик къыз» оюныны косьтеремиз. Бундам гъайры, миллий оюнларымыз боюнджа усталыкъ дерслери беремиз, яни истеги олгъан эр бир адамгъа къырымтатар оюнынынъ элементлерини, арекетлерини огретемиз, оюннынъ тарихыны икяе этип беремиз, — деди ансамбльнинъ бедиий ёлбашчысы Джемиле Османова.
Бунынънен берабер Джемиле ханым фестиваль хусусында теэссуатларынен де пайлашты: «Бу фестивальде бизим медениетимизге меракъ не къадар буюк олгъанына, бизим чыкъышл арымызны не къадар чокъ адам махсус келип сейир эткенине тааджипленмемек мумкюн дегиль. Демек, акъикъий санат эр кеске, миллетинден къатий назар, эр вакъыт меракълы ола.

Источник: QHA