Эбет, шимди эр кесни: «Украинада кечкен матч бизим халкъымыз ичюн ненен тарихий сайыла?», - деген суаль меракъландыра биле. Меселе шунда ки, бу матчта бизим ватандашымыз, «Волынь» командасынынъ уджюмджиси Редван Мемешев эки гол урып, озь такъымына гъалип чыкъмагъа ярдым этти.
Редван Мемешев 20 яшында. Профессиональ спорт карьерасыны 2011 сенеси «Крымтеплица» такъымында башлады. Редван о команда теркибинде биринджи лигада ойнай эди. Бу йылнынъ язында исе команда дагъылгьаны ичюн, Редван «Волынь» командасына кечти. О, Украинанынъ премьер-лигасында «Динамо» такъымы теркибинде дебют япты. Редван бу куньгедже 9 матчта иштирак этти. «Шахтёр»гъа ургъан голлары онынъ премьер-лигада ильк голлары сайыла.
Биз Редван Мемешевни бу мувафакъиетнен джан-юректен хайырлаймыз ве келеджекте янъы гьалебелерге иришип, озь мухлислерине даа чокъ къуванч кетирмесини тилеймиз.