Къурултайнынъ биринджи куню яшлар озьлерини ве такъдим эттиги тешкилятны таныттылар. Сонъра Миллий Меджлис реиси Мустафа Джемилевнинъ видеохайырлавы, КъМПУ ректоры, профессор Февзи Якъубовнынъ мектюби янъгъырады.                          
Экинджи куню секцияларгъа болюнген яшлар тарих, медениет, тасиль боюнджа тюшюнджелери ве бу саада япмасы зарур ишлернинъ планларыны тиздилер. Акъшамлары исе шенъ «Къайтарма» яшларнынъ бири-бирилеринен даа да якъынджа таныш олмаларыны теминледи. Бильхасса халкъымызнынъ севимли оюнларындан бири олгъан «Явлукъ оюны» йигитлеримизнинъ усталыгъыны нумайыш этти. Къырымнынъ татлы сес бульбуллерй Афизе Юсуф къызы ве Эмине Мустафаева халкъ йырларынен бутюн иштиракчилерни хошнут эттилер.
Къурултайнынъ сонъунда невбеттеки къурултайгъа азырлыкъ группасы тизилип, онъа Къырымдан «Меджал» тешкилятынынъ башы Айдер Аджымамбетов кирсетильди.
Къурултайда топлангъан 150 яш дюньядаки бутюн къырымтатарларнынъ екяне Ватаны Къырымдыр ве эр бир къырымтатарнынъ ана-Ватанда яшамагъа акъкъы олгъаны, къырымтатар яшлары тюрк дюньсы ве Ислям алемининъ айырылмаз бир парчасы ол­гъаны, къырымтатар тили ве медениетини сакълап къалмакъ ичюн къолларындан келеджегини япаджакълары акъкъында бирагъыздан айттылар.
Яшларнынъ 6-нджы къурултайы Къырым дернегининъ Анкъарадаки баш меркези эм маневий, эм маддий къолтутувы саесинде кечирильди.